Atvinnumál.
Frá því Klúbburinn Geysir hóf starfsemi hefur hann verið vettvangur starfsleitar fyrir félaga sína. Þau úrræði sem klúbburinn hefur boðið félögum sínum hefur verið atvinna með stuðningi, sjálfstæð ráðning og ráðning til reynslu - RTR.
Atvinna með stuðningi:
Atvinna með stuðningi felst í því að klúbburinn mælir með viðkomandi félaga í starf sem hann hefur áhuga á að sækja um. Starfsmaður fer með honum í viðtal hjá vinnuveitanda og veitir umsækjanda þann stuðning sem hann telur sig þurfa frá klúbbnum vegna starfsins. Sá sem byrjar í slíku starfi er áfram félagi í klúbbnum og hefur alla möguleika á að njóta þeirra réttinda og skyldna sem vera hans í klúbbnum leggur honum á herðar.
Sjálfstæð ráðning:
Við sjálfstæða ráðningu leitar félagi í klúbbnum eftir vinnu á eigin vegum, að eigin frumkvæði og ábyrgð. Viðkomandi fær allan þann stuðning, sem klúbburinn getur veitt honum og hann leitar eftir. Slíkur stuðningur getur t.d. verið meðmæli og aðstoð við að fylla út umsóknir.
Klúbburinn aðstoðar félaga við að reyna fyrir sér í sjálfstæðri atvinnu og að halda í þá vinnu. Þeir félagar sem vinna fulla vinnu halda áfram að njóta sömu réttinda, tækifæra og stuðnings innan klúbbsins. Þar með er talið allt sem lýtur að baráttu fyrir réttindum, lögfræðimálum, fjármálum, húsnæðismálum og öðrum persónulegum málum sem kynnu að koma upp. Einnig hafa þeir rétt á þátttöku í kvöld- og helgardagskrá klúbbsins.
Ráðning til reynslu (RTR):
Í klúbbnum er rekin starfsleit, sem tilheyrir skrifstofudeildinni, þar sem félagar og starfsmenn vinna að því að ná tengslum við vinnuveitendur. Ef það tekst er gerður sex til níu mánaða hálfs dags ráðningarsamningur.
Starfsmaður klúbbsins kynnir sér starfið og þjálfar viðkomandi félaga, vinnuveitanda að kostnaðarlausu. Þegar þjálfun er lokið fer félaginn á launaskrá hjá vinnuveitandanum.
Ef félaginn veikist eða getur ekki sinnt starfinu er klúbburinn ábyrgur og sér til þess að annar sinni starfinu, annað hvort félagi eða starfsmaður. Vinnuveitandanum er þannig tryggð 100% vinnuframlag.
Starfsmaður klúbbsins veitir bæði félaganum og vinnuveitandanum stuðning á meðan á ráðningu stendur og fylgist með gangi mála.
ATH! Störfin eru eign Klúbbsins Geysis og á ábyrgð hans, en ekki vinnuveitanda.
ATH! RTR eru hlutastörf og tímatakmörkuð, að jafnaði 15 - 20 tímar á viku í 6 - 9 mánuði.
Árangur
Í júní 2007 eru 4 félagar í RTR störfum. Frá upphafi starfseminnar hafa fleiri en 60 klúbbfélagar hafið störf á hinum almenna vinnumarkaði eða farið í nám.
Ummæli
Reynsla vinnuveitanda
„Félagsmálaráðuneytið gerði fyrst samning við Klúbbinn Geysi í desember 2004 um „Ráðningu til reynslu“ og var nýr samningur gerður í maí 2005. Starfið í ráðuneytinu er í móttöku þess og eru helstu verkefnin ritvinnsla, ljósritun, símsvörun, undirbúningur veitinga á fundi, umsjón með kaffistofu og önnur tilfallandi verkefni.
Á þessum tíma hafa þrír einstaklingar komið til starfa í ráðuneytinu á grundvelli samninganna, tveir karlmenn og ein kona. Óhætt er að segja að reynslan af verkefninu hafi verið mjög góð. Við vonum að sjálfsögðu að umræddir einstaklingar hafi haft gagn af verunni í ráðuneytinu en það er ekki síður mikilvægt að starfsfólk ráðuneytisins hefur lært af því að fá félaga úr klúbbnum í ráðuneytið. Það er mjög ánægjulegt að taka á þennan hátt þátt í því góða starfi sem Klúbburinn Geysir stendur fyrir og axla um leið að því leyti samfélagslega ábyrgð gagnvart einstaklingum sem eiga eða hafa átt við geðræn veikindi að stríða.“
Sesselja Árnadóttir, skrifstofustjóri
Félagsmálaráðuneytið / Almenn skrifstofa
Einar Sandoz vinnur í RTR starfi hjá Vitatorgi. Hér er hans reynsla: „Ég var búin að vera félagi í Geysi í tvö ár og hafði ekki sérstaklega stefnt á vinnumarkað, þegar þessi snjalla hugmynd um RTR barst mér til eyrna. Síðan þá hefur viðhorf mitt til tilverunnar breyst til hins betra. Ég hef komist að því að ég bý yfir miklum styrk. Ég mun halda áfram að horfa á styrkleika mína, til þess að halda áfram í jákvæða átt á vinnumarkaði“.